C'era ‘na vota
vicinu ‘a Carpanzanu
na casa ccu finestre e ccu barcuni,
ccu vasi e jiuri
e rose mpurpurate
ca profumavanu tuttu ‘u vicinatu.

Lladi vicinu
u sule ca nascìa
si ‘cce fermava prima d'ogne parte,
e,
quannu a malincore sinne jìa,
lassava ‘ncaricata
a ra cchiù bella de tutt'e rose
a ‘un chiudere le porte
ca l'indomane forra riturnatu!

E riturnava ‘u sule
ogni matina;
e sinne jìa ‘ra sira…
e pue turnava ancora,
e sinne jìa…
mentre cchiù forte,
ppe tutti i santi juarni
u profumu di ‘jiuri se spannìa.

Ma na matina u sule
appena jìu,
trovau porte ‘e finestre ‘mbardicate,
trovau tutti li jiuri
ormai appassiti
e de le rose ‘e foglie sparpagliate.

Capìu ru sule!
E ciancìannu,
chianu chianu,
s'alluntanau ppè sempre
‘e Carpanzanu.