QUANNU TUARNU

Quannu tuarnu

'a ru paise mio

me siantu 'ncuaddu

n'allegrizza ranne.

'U core para

chi me vatta

cuamu 'nu tammurru.

Ma quannu sagliu i scaluni,

e trasu intra,

'un siantu cchjiù

'u sthrùsciu

chi papà facìa

a ru tavulatu

ccu quattru vecchjie tavule.

A ru fhuacularu

tizzuni e zucchi

'u' nne vidu cchjiù.

A 'nnu muru attaccatu

guardu ‘nu quatru ccu 'a figura

d'a povera mamma mia

chi sercìa 'a lana

davanti 'u putighinu:

allura 'nu nudicu a ra gula

m'attinaglia e

l'allegrizza mia diventa amara.

2003